奥斯卡2019 大热Lady Gaga自爆遭强奸 Olivia Colman做过清洁工 候选影后的血泪史

　　星爷嘅新片《新喜剧之王》讲女主角如梦追演艺梦成为城中热话，讲到挨出头，一班奥斯卡候选影后亦同样有过坎坷血泪史，有人曾穷到户口得$5美金，有人曾惨被性侵，就连经历生离死别都要照开工，为梦想瞓身，今年终于挨上影坛盛事争大奖！

　　Lady Gaga第一次主演电影《星梦情深》（A Star is Born）就成功冲奥争影后，睇落好顺利啦？其实佢同样人生如戏，缀学做歌手嘅路已经好艰难，未获赏识时曾去酒吧著T-back跳艳舞赚钱，19岁时更曾惨被唱片公司高层强奸，身心留下创伤，引发嘅纤维肌肉痛至今仍时有发作，多次痛到停工。

　　Lady Gaga不但好似《星》片嘅主角最初冇人欣赏，成名路曲折，佢拍摄电影期间更惨历生离死别。

　　佢曾于访问中自爆拍摄重头戏前得悉患癌嘅挚友兼前助手Sonja Durham弥留，即赶到对方家中，但仍见唔切最后一面，陪伴对方家人一段时间后即返到片场开工，最后唱出感人至深嘅结尾场面，准影后打动观众嘅背后，系痛彻心扉嘅伤悲。

　　喺《争宠》（The Favourite）中演安妮女王与Emma Stone上演激烈SheShe床戏嘅英国实力派影星Olivia Colman系影后大热之一。

　　不过佢未成名前生活曾经艰难，住喺朋友嘅阁楼，仲试过爬沙发底揾散纸买薯仔食！

　　Olivia仲做过清洁工同埋秘书，亦有段时间个个月畀一半粮帮老公还债，生活五味纷陈都试过，相信演出唔同角色都特别入戏！

　　另一个大热就系凭《仁妻》（The Wife）扫尽多个颁奖礼影后殊荣嘅Glenn Close。

　　佢唔系好穷又或者后生时挨过咩工作，而系佢入行咁多年，曾试过6次提名奥斯卡，但次次都失手而回，被封无缘获奖嘅陪跑黑仔王，即系人人都知你好，但奖金奖品都冇你份！

　　佢早年分别凭《阿甲晒命》、《山水又相逢》同埋《天赐奇才》提名奥斯卡最佳女配角，镬镬陪跑都算，之后凭《孽缘》、《孽恋焚情》同埋《艾拔贵性》争影后一样系输晒，今年已经77岁嘅佢，今年系第7次提名奥斯卡，难怪自言获奖真系意义特别大！

　　墨西哥名导Alfonso Cuaron执导嘅《罗马》（Roma）大获好评，第一次演戏嘅女主角Yalitza Aparicio亦获提名奥斯卡影后，成为影史上首个获提名嘅墨西哥土著

　　虽然一击即中好似好威，不过本身做老师嘅Yalitza其实冇谂过靠演出发达，全家屈居于墨西哥郊区小屋嘅佢因为土著身份而被歧视，从未有人揾过佢哋拍戏，自言系因为大肚家姐想知试镜系点，佢先代为试一试，幸而一试即Chok出潜能。

　　讲到被歧视，仲有美国谐星Melissa McCarthy，入行多年嘅佢一直被视为大码搞笑演员。

　　定晒型而且鲜有被人当系认真演出嘅实力派，幸而今年终于凭《大老作家》转型成功，晒演技获提名影后！不过佢成名前亦曾试过争到一身卡数，户口仲得返$5美金，有边个估得到佢专注追梦，而家已经变成身家6000万美金嘅富婆？