看《冰雪奇缘2》前你要知道的5件事！Elsa原来钟意女仔？！

　　Elsa 同 Anna返嚟啦，《冰雪奇缘2》上映日期已经确定为今年11月26日！《冰雪奇缘》（Frozen）相信你就算无睇过，都一定会听过首主题曲Let It Go，又或者一定认得粉蓝色裙配白色长发嘅Elsa公主！无论你有冇睇过《冰雪奇缘》，小编都决定为大家嚟个特训班，话你知5件关于《冰雪奇缘》嘅小事！

　　1.Olaf名字超有意思

　　Olaf呢个雪人仔喺第一集《冰雪奇缘》已经大受观众欢迎，凭著天真乐观性格，加上圆咕碌嘅笨拙身形成功突围而出。但原来Olaf呢个名大有意思，Olaf读起来同Oh Love发音相同，象征著愿意为爱牺牲。

　　Olaf从来无经历过夏天，却一直憧憬夏天。Olaf嘅人物灵感同设定原来系嚟自安徒生童话嘅《雪人》（The Snowman）篇章：雪人深深爱上火炉，但最后被火炉嘅热力溶化，既凄美又浪漫。

　　2. Elsa钟意女仔？

　　自《冰雪奇缘》第一集播出后，呢个话题已经受网民热烈讨论。由于Elsa出世时已经同其他人唔同，再加上喺电影入面佢多次强调自己并唔系一个Good Girl（乖女孩），令到网民猜测当中可能有隐语。

　　《冰雪奇缘》第二集预告片播出之后，更加令网民怀疑Elsa可能真系钟意女仔。因为预告片出现新女性角色，网民就猜测呢位新卷发女孩可能就系Elsa嘅感情对象。加上有消息指《冰雪奇缘2》请嚟双性恋女星Evan Rachel Wood为电影配音，令网民更加相信Elsa同性恋呢件事系真！唔知《冰雪奇缘2》会唔会真系披露Elsa嘅性取向呢？

　　3. Elsa 原本系大反派

　　喺创作Elsa呢个角色嘅初期，Elsa拥有浅蓝色嘅肌肤，加上又短又岩巉嘅头发。系经过多番改良加上Let It Go主题曲被创作后，制作团队先决定将Elsa改头换面，变成又靓又有气质嘅Elsa公主。

　　4.《冰雪奇缘》故事构思长达 70 年

　　《冰雪奇缘》故事灵感源自1844年嘅安徒生童话《雪后》（The Snow Queen），迪士尼其实由1940年代开始就已经研究安徒生童话，但直到2010年先正式将童话改编成动画，然后最终喺2013年推出《冰雪奇缘》。

　　5. 36秒场景需时5日

　　Elsa起城堡呢一幕相信每一个睇过《冰雪奇缘》嘅人都一定会记得。但你有冇谂过36秒场原来用咗5日先搞掂！创造呢一幕总共动用咗50人，而每一格分镜需要用30小时完成！