如果蜗牛有爱情有性，点解就系无名份？

　　如果蜗牛有爱情!当年初初开始玩Facebook，好多朋友纷纷写上一大堆资料，包括生日、读书、工作地方、兄弟姊妹等等，唯独写到恋爱状态一栏，大家先突然发现，做人都系唔好太诚实。Single嘅人当然会大大只字写住Single；in relationship嘅人一半会如实报导、一半会借啲意唔填，有少数就会侧侧膊填返Single。司马昭之心，路人皆知。

　　如果冇记错，我系之后先发现complicated同埋open relationship呢两个选项。唔知系以前Facebook谂得唔够周详，定系后来嘅人类关系越来越复杂，以致出现咗好多新兴嘅恋爱方式。细个嘅时候世界好简单，拍拖就拍拖，单身就单身，冇乜灰色地带。今时今日互联网开始流行，好多以前唔会浮上水面嘅恋爱方式，渐渐成为日常生活嘅一部份。

　　Complicated究竟系一种点样嘅关系？唔好问其他人，我相信就连当事人都讲唔出答案。两个人一齐Whatsapp、倾电话、食饭、睇戏，仲会Book房......一齐瞓晏觉；男同女互相关心，甚至会倾诉家庭等等私密话题、喺特别日子讨好对方制作惊喜小礼物，做尽一切情侣间会做嘅事。只系当有人问到当中关系嘅时候，大家都系支吾以对，然后尴尬答返句：普通朋友啫～

　　作为局外人，大家自然会觉得，呢一种只不过就系SP嘅关系，但我又唔系咁睇。除非你哋每次做完爱，都系拍拍屁股，然后讲声拜拜就走人；如果你每次都会关心对方事后舒唔舒服、怕唔怕屋企人担心夜返屋企，其实大家心里面都有一份不能明言嘅爱意。性同爱未必一定系平衡，但终究难以完全分开。

　　点解有爱有性，但就系冇名份？除咗双方都有家室/伴侣等等客观因素之外，最大原因恐怕系源于呢种暧昧关系太吸引，若即若离但又充满激情。无论男女，心底里都渴望一种刺激嘅关系；一旦摊牌表示希望有进一步发展，你深怕对方只不过当自己系一位SP，更甚嘅系，一开口就可能失去呢一段关系。

　　另一个原因系，由于大家双方都喺不明不白嘅情况之下，由陌路走到床上。你虽然向往呢一种刺激嘅交往方式，但你亦恐怕，他朝对方都有可能用同样方式、同另一位对象暗暗开展新一段浪漫。无名份嘅关系有一种诱人力量，同时亦带来不安；正所谓呃人首先要呃到自己，自欺欺人大概系爱情之中嘅最坏罪名。