就算稳定交往中也要注意！不要做这5件令对方伤心的事

　　情侣一齐久了感情稳定了，就自不然会步入老夫老妻嘅阶段，已经唔会再好似热恋期咁日日氹日日见。好多时一齐耐咗习以为常反而会忽略小细节，而呢啲小细节可能系啲鸡毛蒜皮嘅小事，但对方就往往会因为呢啲小事而唔开心，究竟有边几样小事容易中招呢？

　　1.不说早晨晚安

　　就算无得面对面讲都会send message讲，相信唔少情侣喺热恋期嘅时候必定会日日讲。热恋期会做嘅嘢点解去到稳定期会愈嚟愈少呢？好多时可能都会话唔记得咗或者太攰瞓咗，但讲真一句早晨晚安要几耐，懒就懒啦唔好再揾借口啦。

　　2.遇见朋友松开手

　　小编明白有好多情侣都唔钟意公开恋情，所以就算稳定交往中，身边朋友都未必知你拍紧拖。所以好多时情侣喺街上遇到朋友会立即松开手，但其实呢个举动会令女孩子心碎，有一种不被确定嘅感觉，既然撞到朋友仔不如大方公开啦，拖住另一半走上前打个招呼其实唔系好难姐。

　　3.唔好用喊去威胁另一半

　　系唔少女孩子嘅通病，千祈唔好以为喊就可以解决一切。你喊然后对方就你，系因为佢爱你，唔忍心见到你唔开心，但千祈唔好滥用佢对你嘅好，更加唔好用眼泪做威胁对方嘅工具，因为喊并唔系解决问题嘅方法。

　　4.嗌交会抛低你喺街

　　有咩唔啱咪讲到啱，返到屋企再慢慢倾，点解要抛低另一半喺街然后自己走咗去。怒气冲冲走咗去然后留低另一半绝对唔系解决问题嘅方法。相反，只会令感情变差，因为对方会觉得你对佢唔在意，如果你抛低佢之后发生啲咩事点算。

　　5. 先斩后奏

　　一齐耐咗就觉得唔使处处交代或商量，好多时都自己决定咗之后再知会另一半，出现先斩后奏嘅情况。小编相信先斩后奏呢个情况喺热恋期嘅时候都唔会常常出现，咁点解到稳定期时会老是常发生？作为情侣有咩事就一齐商量一齐决定，就算对方反对都必定有佢嘅原因，千万唔好次次都先斩后奏，你根本都唔会征询对方嘅意见。